Schnitzelbänke 2018

Geniessen Sie den Video-Film von der Schnitzelbanksoirée 18, 
aufgenommen im KiB-Murten.

Ganze Länge 92 Minuten. SchnureGige ab 42. Minute.

Viel Spass!

https://youtu.be/jaZ0-EymFLY

Schnitzelbänke 2017

Klapperschlange si gfärlech Tier
si schliiche ume im Revier
si sueche sich es Opfer us
u bisse zue, es isch e Grus
verwächsle ig das Giftig-Tier
mit de Murtner Parkplatz-Schmier

Froue Abe, i bi elei
em Morge em drüü chunnt si ändlech hei
u de hets ganz lut klöpft u tätscht
si isch gredi dür z’nöie Garaschtor brätscht
zum Glück, so hani das verstange
isch si z’ Fuess i Usgang gange

Jetz gits d’Pille für e Maa
mi Schatz wott o ne Schachtle ha
är rennt sofort id Drogerie
wirft täglech jetz e Piue i
u jede Morge am Z’Morgetisch
fröit är sich, wenn er nid schwanger isch


Wenn zwöi Pärsone imne Hus tüe wohne
gits z’Murte grad e 30-er Zone
mit em Outo chunsch fasch nümm ewägg
fahrsch chum me schnäuer aus e Schnägg
es Radar-Grät brucht d’Schtadt nid z’zahle
schtatt Blitze, cha di d’Schmier ja mahle

Stars of Sounds das lat ke Rueh
nur ir Längmatt tüe si d’Ohre zue
doch z’letscht Mau isch es angers gloffe
da het me d’Längmatt-Froue troffe
uf de Bauköön im Neglischee
u lose heimlech der Gaballier

Mi Chatze-Kater Mephisto
isch geschter unger z’Outo cho
jetz müesst i e Brise Seelsorg ha
u lüte em Pfarramt Murte a
doch dr Pfarrer lat mi glatt la sitze
är müess Deheime Härdöpfu spitze

Schnitzelbänke 2016

Für die nöii Brandlösch-Üebigstruppe
suecht d’Füürwehr e aute Üebigsschuppe
me würd dä Schuppe ine Brand versetze
u d‘ Üebigstruppe mit em Schluch drasetze
mir faut e so ne Schuppe i
wie wärs ächt mit der Cheeseri


Dr Bio-Buur vo Überstei
sid 12 Jahr isch är ganz elei
är suecht e Frou im Internet
für Hof u Huus u Tisch u Bett
sächs Monet schpeter am ne Sunntig Morge
isch z‘ Bio-Buurli Vatter worde
u gloubt die schnäui Manneschraft
chunnt vo sim Bio-Rüeblisaft

Dr Blatter Sepp het übertribe
isch viu z’lang bi dr FIFA blibe
är het gmacht was är het wöue
was Anger wie das tuet nid zeue
Ha vieles ghört u tue jetz meine
Bim FC Murte heigs o so Eine



Die nöii Uhr vum Hildebrand
louft viu z‘schnäu a mire Hand
u woni wieder im Lade stand
für d‘Korrektur vor Uhr ar Hand
da mufflet är: was i da wett
die louft ja schnäuer aus si sött

Im Morgezug vu Murte uf Bärn
da lies i z’20 Minute gärn
doch jede Zischtig und jede Fritig
da lies i d‘Murtebieter-Zytig
u we mir z Galmiz düreritte
bi ni scho uf der letschte Site

Mir Nachbarin geits gar nid guet
het Würm im Darm u viu z’dicks Bluet
het Haarusfau u Ohresuuse
cha nur mit Schlaftablette pfuuse
defür isch sie, das isch hüt inn
sit 7 Monet Veganerin